بقلم: الدكتور احمد حمدى
انتشرت ف الفترات الأخيرة ظاهرة بياعين ف الشارع والاسواق ( واحياناً بنلاقيهم بيعلنو عن نفسهم ع الفيس بوك) بيبيعوا فراخ بأقل من نص تمنها عند الفرارجي
ولو لاحظت كده انه بيبيعها بالفرخة مش بالكيلو يعني يقولك الفرخة ب 25 مثلا
ولو دققت أكتر هتلاقي أوزان الفراخ دي مش بتتعدى الكيلو وربع وتلاقيها كده هزيلة في معظم الأحيان
لا وكمان البياع سكينته في إيده بحيث تشتري الفرخة يدبحهالك فوري وأنت واقف وده طبعاً لأنك احتمال كبير إنك لو أخدتها حية وعلى بال ماتوصل بيتك تكون ماتت في إيدك….
أيوه ماتت لأنها فراخ بتكون مريضة في معظم الأحيان أو معيوبة وصاحب المزرعة بيتخلص منها بأنه يبيعها للتجار دول وللأسف بعض المطاعم اللي معندهمش ضمير.
دي بقى اسمها الفراخ السردة
يعني ايه فراخ سردة ؟!
دي عبارة عن فراخ تسمين عمرها عدي 30 يوم مثلا وأكلت كل العلف المناسب ليها
بس حجمها فضل قليل في حدود كيلو وربع طب ليه الفرخة توصل لمرحلة السردة
ده ليه كذا سبب من أهمهم :
مشكلة في التحضين او في الفرشة او في مساحة التحضين والتعليف ومشاكل التهوية والحرارة
وده بيسبب فرخة مناعتها ضعيفة وهزيلة ومعرضة للأمراض وممكن تكون مصابة بالفعل
وفي الحالة دي أصحاب المزارع بيتجهوا لبيعها لتجار السردة واللي بيعمل نفسه بتاع الراجل الفقير لأنه بيبيعها بنص التمن
